نصائح مهمة اوى لسنة اولى جواز
عروسة جديدة..
بقالك كام أسبوع..
أو عروسة.. وقدامك كام شهر أو كام يوم وتدخلي القفص الذهبي...
خايفة ومحتارة ومش عارفة تعملي إيه في العالم والحياة الجديدة اللي أنتِ داخلة عليها دي..
وخصوصا إنك خلاص هتسيبي بيت بابا وماما وهيكون لك بيتك الخاص اللي أنتِ مسئولة عن كل حاجة فيه من الألف للياء...
تجهيز طلبات البيت!
بعد انتهاء شهر العسل وانتهاء أيام العزومات اللي كانت في بداية الجواز النهارده عند أختي بكرة عند خالتي، النهارده عند والدتي، وغيرها من العزومات اللي بتكون في بداية الزواج....
جه الدور عليكِ يا عروسة علشان تروحي السوق تجيبي طلبات البيت وتدخلي المطبخ وتعملي الأكل أصل مش معقول يعني جوزك يروح الشغل وييجي يلاقيكِ مش عاملة الأكل، ممكن أول مرة يعديها ويقول لك ولا يهمك يا حبيبتي هنطلب دي دليفري النهارده، وممكن تاني مرة برضه يعديها ويقول لك ولا يهمك هننزل ناكل بره...
بس أكيد الوضع ده مش هيستمر على كده على طول أكيد هييجي في مرة ويقول لك فين الأكل هتقولي بكل بساطة ماعملتش أكل النهارده..
هيقول لك ليه؟؟ في إيه؟؟؟ ده حتى الثلاجة كمان فاضية مافيش فيها أي حاجة تتاكِل..
هتقولي له بصراحة طلبات البيت خلصت وأنا مش باعرف أجيب طلبات للبيت وكمان مش باعرف أطبخ قوي.. أصلي ماخدتش على كده في بيت أهلي، ماما هي اللي كانت بتعمل كل حاجة... "من الآخر كده أنا مش باعرف أي حاجة نهائي".
في الوقت ده قدامه حل من الاتنين، إما يتصل بمامتك ومامته ويقول لهم تعالوا شوفوا بنتكم وعلموها ازاي تروح تشتري طلبات البيت وازاي تطبخ...
وبكده يا حلوة يبقى إنتِ اللي دخلتِ حماتك ومامتك بإيدك في حياتك واستحملي بقى المشاكل اللي هتحصل بعد كده خاصة لو كانت حماتك ومامتك من نوعية "ماري منيب" و"ميمي شكيب" في فيلم "حماتي ملاك".
أو إنه يرضى بالأمر الواقع ويقول لك طيب ولا يهمك اتعلمي واحدة واحدة وفي الحالة دي هتلاقي نفسك محتاجة لحد يساعدك.
علشان كده قررنا إن احنا كمان نساعدك ونقول لك على الحل المفيد..
ونقول لك كمان على أحسن الطرق اللي بيها ممكن إنك تشتري كل طلبات بيتك بسهولة جدا في ثلاث خطوات وبس من غير ما تحتاجي أي مساعدة من حد غريب.. إنتِ طبعا فاهماني ..
وكمان هنقول لك ازاي إنك تحتفظي بالحاجات دي لأطول فترة ممكنة ده بالإضافة إلى الأساسيات اللي بيها ممكن تجهزي الأكل..
نشوف مع بعض
الخطوة الأولى
هاتي ورقة وقلم وادخلي المطبخ
قبل ما تنزلي تشتري طلبات البيت هاتي ورقة وقلم وادخلي مطبخك وشوفي إيه اللي ناقص عندك في المطبخ واكتبي "لِستة" بالحاجات اللي إنتِ محتاجة لها.
بعد كده شوفي معاكِ كام بالضبط وفي حدود اللي معاكِ اعملي فلترة للحاجات اللي إنتِ محتاجة لها بحيث إنك تشتري الأهم فالمهم..
طبعا دلوقتي بتسألي نفسك وتقولي إيه ده هو كل يوم هاروح السوق أجيب طلبات للبيت ولاّ إيه؟؟
هاقول لك: "لا طبعا لأنك ببساطة شديدة ممكن إنك تجيبي طلبات تكفيكِ من أسبوع إلى أسبوعين وتشيليها عندك في الثلاجة".
وياريت كمان إنك في اليوم اللي هتجيبي فيه طلبات البيت تصحي من بدري وتروحي السوق وده علشان تلاقي الطلبات اللي إنتِ عايزاها قبل ما الحاجات تخلص من السوق.
الخطوة الثانية
وإنتِ في السوق
بعد ما حددتِ الطلبات اللي إنتِ عايزاها والكمية اللي إنتِ عايزاها هتنزلي السوق أو السوبر ماركت وتجيبي الطلبات اللي إنتِ عايزاها..
وعلشان تبقي ناصحة وماحدش يضحك عليكِ لازم تكوني عارفة ازاي تختاري طلبات البيت..
يعني مثلا لو كنتِ هتشتري:
• طيور، زي "الفراخ أو الحمام أو البط"
لو هتشتريها صابحة من عند الفرارجي يبقى خدي بالك إن جلدها يكون متماسك وكله لون واحد ومافيش عليه أي آثار للكدمات أو إنه يكون مزرِق مثلا.
لو هتشتري الطيور دي من عند السوبر ماركت أكيد طبعا هتكون مجمدة.. في الحالة دي تاخدي بالك إن مايكونش فيها أي آثار للماء أو بلورات الثلج يعني تكون متجمدة كويس وتاخديها وتروحي على البيت على طول وتحطيها في الفريزر علشان ماتديش فرصة إن التلج بتاعها يفك.
بس نصيحة بيني وبينك كده الطيور الطازجة أحسن مية مرة من الطيور المجمدة.
• لو كنتِ هتشتري لحمة
لازم تكون من عند جزار موثوق فيه علشان تتأكدي إن اللحمة دي كويسة وخدي بالك إن لون اللحمة يكون وردي قاتم وتجنبي نهائيا اللحم المخضر المائل إلى الرمادي أو المبلل لأن دي بتبقى لحمة فاسدة.
• لو كنت هتشتري سمك
السمك سواء اللي بيعيش في المية المالحة أو العذبة لازم يكون عيونه لامعة ممتلئة ورطبة وخياشيم السمكة نظيفة لونها أحمر ومايكونش عليها أي أثر لمادة لزجة وجلد السمكة يكون بيلمع ورطب وألوانه واضحة وصلب مافيش فيه أي خدوش.
لكن لو كنتِ هتشتري سمك فيليه يبقى خليكِ شاطرة واشتري السمكة كاملة وبعد كده خلي اللي بيبيع يقطعها لك.
• لو كنتِ هتشتري خضراوات أو فاكهة
يبقى ياريت برضه إنك تشتري الخضراوات والفاكهة الطازجة ودي هتعرفيها من لونها يعني يكون لونها زاهي.
• ولو هتشتري حاجات معلبة
لو رحتِ السوبر ماركت وحبيتِ إنك تشتري حاجات معلبة يبقى ياريت إنك تشوفي تاريخ الصلاحية والانتهاء اللي بيكون مكتوب على العلبة وكمان خدي بالك إن العلبة تكون مقفولة وسليمة.
الخطوة الثالثة
بعد ما ترجعي البيت
بعد ما رحتِ السوق واشتريتِ كل الطلبات اللي إنت عايزاها رجعتِ على البيت دخّلي الحاجات اللي جبتيها المطبخ وغيري هدومك ووضبي الحاجات اللي إنتِ جبتيها، يعني شوفي إيه اللي هتستخدميه النهارده وإيه اللي هتشيليه في الثلاجة لحين الاستخدام...
وخدي بالك إن كل حاجة من اللي إنتِ اشتريتيها دي ليها طريقة معينة في تجهيزها فهتلاقي مثلا:
بالنسبة للفراخ أو الحمام أو البط..
شيليها من الكيس بسرعة ونظفيها تاني.. أنا عارفة إنك هتقولي إن صاحب المحل نظفها هاقول لك إن تنظيف صاحب المحل حاجة وتنظيفك إنت حاجة تانية خالص..
وده لأنك هتنظفيها أكتر منه مية مرة بإنك هتغسليها تاني من جوه ومن بره، وتشيلي أي آثار للريش أو أي دم موجود عليها وبعد كده تحطيها في طبق كبير وتدعكيها كويس بالملح من جوه ومن بره، وتعصري عليها نص ليمونة وتسيبيها لمدة نص ساعة وبعد كده تغسليها كويس بالميّة من الملح والليمون وتشوفي بقى هتعملي فيها إيه..
فمثلا:
• لو كنتِ هتسلقيها.. يبقى اغلي مقدار مناسب من المية وبعد ما المية تغلي حطي الفراخ أو البط، بعد كده هاتي بصلة وقسميها إلى نصين وضيفيها إليها، لما تلاقي إن الفراخ قرّبت تستوي ضيفي إليها مقدار مناسب من الملح والفلفل والبهارات.
• لو كنت هتشويها.. يبقى هاتي بصلة وقطعيها قطع صغيرة جدا وبعد كده ضيفي إليها التوابل والملح والفلفل وانقعي فيها الفراخ أو أي حاجة إنتِ عايزة تشويها لمدة ساعتين وبعد كده شيليها من البصل واشويها.
• لو كنتِ هتجمديها في التلاجة لغاية ما تحتاجي ليها..
يبقى في الوقت ده نشفيها كويس من المية وبعد كده هاتي كيس بلاستيك ناشف وحطيها فيه وبعد كده فرغي منه الهواء واقفليه كويس وحطيها على طول في الفريزر.
بالنسبة للحمة..
• لو كنتِ هتشيليها في التلاجة.. يبقى طلعيها من الكيس البلاستيك وبعد كده حطيها في حلة وحطيها في التلاجة على الرف اللي تحت الفريز لمدة أربع ساعات وبعد كده هاتي كيس بلاستيك ناشف وحطيها فيه وفرغي أي هواء في الكيس واقفليه كويس وشيليه في الفريزر لحين الاستخدام.
• لكن لو كنت هتسخدميها على طول.. يبقى اغسليها واسلقيها وبالهنا والشفا..
بالنسبة للسمك..
بعد ما تروحي البيت على طوول طلّعي السمك من الكيس بتاعه ونظفيه كويس..
ودي طريقة تنظيف السمك:
امسكي وسط السمكة وابشري جلدها باتجاه الرأس بسكين أو بحافة سكين غير حادة.
قصي الزعانف بواسطة مقص حاد.. شقي جانب السمكة بسكين حادة كبيرة من أسفل رأسها حتى بداية ذيلها وتأكدي من أنها قد شقت جيداً من الداخل.. شيلي الأمعاء ونظفي بطن السمكة كويس.
بعد كده نظفي السمك بالمية الباردة وبأكِّد بالمية الباردة، وده لأن السمك بيستوي بسرعة فلو غسلتيه بمية سخنة ممكن إنه يتسلق منك، اغسلي السمك كويس أكتر من مرة.
بعد كده اعصري عليه كمية كبيرة من عصير الليمون وسيبيه لمدة نص ساعة وبعد كده اشطفيه كويس وشوفي هتعملي فيه إيه..
فمثلا:
• لو كنتِ هتشيليه في الثلاجة لحين الاستخدام.. يبقى سيبيه لغاية ما ينشف وحطيه في كيس بلاستيك ناشف وشيليه في الفرزير.
• لكن لو كنتِ هتسويه.. يبقى اغسليه كويس من الليمون وجهزي التتبيلة بتاعته اللي هي عبارة عن (عصير ليمون+ بهارات سمك+ كمون+ نص راس ثوم+ فلفل حار أخضر+ ملح)، واطحنيهم مع بعض كويس في الهون وبعد كده ادعكي بيهم السمكة من جوه ومن بره وتسيبيها لمدة ساعة وبعد كده تستخدمي السمك زي ما إنتِ عايزة تشويه أو تقليه أو تعمليه صينية.
بالنسبة للخضراوات والفاكهة..
لو كنت جايبة كمية كبيرة من الخضراوات والفاكهة يبقى ياريت إنك تحفظي الخضار والفاكهة اللي إنتِ مش محتاجة لها لحين الاحتياج لها.
ودي طريقة بسيطة جدا لحفظ الخضار والفاكهة..
• بالنسبة للخضراوات الورقية اللي زي النعناع والبقدونس والشبت والك***ة والجرجير:
حطيهم في كيس بلاستيك ناشف من غير ما تغسليهم وتحطيهم في التلاجة ودي أحسن طريقة تخليهم يعيشوا معاكِ في التلاجة لمدة أسبوعين..
• بالنسبة للطماطم:
لو كانت الطماطم طرية يبقى اغسليها كويس وبعد كده قطعيها واضربيها في الخلاط لغاية ما تبقى عصير، بعد كده صفيها وحطيها في أكياس نايلون ناشفة وحطيها في الفريزر لحين الاستخدام.
لكن لو كانت الطماطم جامدة يبقى حطيها في مصفاة وحطيها في الثلاجة زي ما هي.
• بالنسبة للفلفل والبسلة والقرنبيط والجزر:
من الممكن حفظ حبات الفلفل الرومي بالتجميد عن طريق إنك تغسلي حبات الفلفل وتقطعيها شرائح طويلة أو مكعبات، وتحطيها في أكياس نايلون وبعد كده تحطيها في الفريزر..
والبسلة والقرنبيط والجزر ممكن إنك تعملي معاهم زي ما عملتِ مع الفلفل الأخضر.
• بالنسبة للبصل والثوم والبطاطس:
دول مش محتاجين إنك تحطيهم في الثلاجة لأنك ممكن تحطيهم في مصفاة وتحطيهم في أي زاوية من زوايا المطبخ.
• بالنسبة للفاكهة:
من الممكن إنك تغسليها وتنشفيها كويس وبعد كده تحطيها في كيس بلاستيك ناشف وتحطيها في الثلاجة أو الفريزر.
وبكده يبقى إنتِ جهزتِ طلبات البيت وخليتيها عندك لغاية ما تيجي تستخدميها.
نشوف مع بعض النصائح دي
**************************
النصيحة الأولى
لما تيجي تسلقي البطاطس ياريت إنك تضيفي عصير نصف ليمونة إلى ميّة السلق علشان البطاطس ماتسودش وتحتفظ بلونها الأبيض.
ولسهولة نزع قشر البطاطس المسلوقة يبقى ياريت إنك تحطيها في ميّة باردة بعد ما تستوي على طول، وبعد كده تقشريها.
ولو عايزة تعملي بطاطس شيبسي زي اللي بتشتريها يبقى بعد ما تقشري البطاطس قطعيها "بماكينة تقطيع البطاطس اليدوية" إلى شرائح ضعيفة جدا وبعد كده انقعيها لمدة ساعة في ميّة أضيف إليها ملعقة كبيرة ملح وملعقة كبيرة خل وبعد كده سخني الزيت كويس واقليها فيه.
النصيحة الثانية
لو هتستخدمي لحمة أو فراخ من اللي في الفريزر يبقى ياريت إنك تطلعيها من الفريزر قبل ما تسويها بحوالي 12 ساعة وتحطيها على رف الثلاجة الأخير لغاية ما تفك ثلجها.
وماتسمعيش كلام حد يقول لك إنك تطلعيها من الفريزر وتحطيها في ميّة سخنة علشان تفك من التلج بسرعة لأن الموضوع ده بيخلي جلدها يتشقق وبيبقى طعمها مش حلو..
وخدي بالك من إنك لو طلعتِ أي حاجة من الفريزر وفكِّت ثلجها يبقى ماترجعيهاش تاني الفريزر لأن ده بيعرضها للتلف.
النصيحة الثالثة
اوعي تستخدمي السمن بنوعيه النباتي والحيواني والزيت أكتر من مرتين في القلي وده لأن المواد الدهنية تتحلل وتصدر منها أحماض ضارة تسبب -لا قدر الله- الإصابة بأمراض خطيرة زي "السرطان" أو "التسمم".
النصيحة الرابعة
يمكن التقليل من الملح الموجود في الزيتون المخلل أو أي حاجة مخللة بإنك تنقعيها طوال فترة الليل في ميّة وتحطيها في الثلاجة.
ولو عايزة تخللي أي حاجة في البيت ياريت إنك تستخدمي برطمانات زجاج وابعدي نهائيا عن البرطمانات البلاستيك لأنها مضرة جدا على الصحة.
النصيحة الخامسة
لو هتعملي سلطة خضراء قبل ميعاد الأكل بفترة كبيرة يبقى ياريت إنك ماتضيفيش إليها التوابل إلا عند التقديم وياريت إنك تضيفي إلى طبق السلطة الخضراء عصير ليمون علشان تحافظي على الفيتامينات اللي فيها.
نفس الشيء مع العصائر ياريت إنك ماتعمليهاش وتسيبيها لمدة طويلة في الثلاجة لأن بكده ممكن إنها تفقد قيمتها الغذائية.
النصيحة السادسة
ياريت دايما تخلي نار البوتجاز هادية وإنت بتتطبخي وده لأن النار الهادية بتخليكِ تتحكمي في الأكل كويس ومش بتخلي الأكل يلزق منك بسرعة. ده بالإضافة إلى إن الأكل اللي بيستوي على نار هادية بيكون طعمه ألذ من اللي بيستوي على نار عالية.
النصيحة السابعة
حافظي على نظافة أدوات المطبخ أولا بأول يعني لو استخدمتِ السكينة علشان تقطعي بيها أي لحمة نيئة يبقى بعد ما تخلصي التقطيع اغسلي السكينة على طول واوعي تستخدميها في تقطيع الخضراوات أو أي حاجة تانية إلا بعد ما تغسليها كويس.
النصيحة الثامنة
ياريت تحتفظي بالبهارات في مكان جاف لأن الحرارة أو الرطوبة الزايدة بتخلي الأعشاب والبهارات الجافة تفقد نكهتها بسرعة.
علشان كده ياريت ماتخزنيش الأعشاب والبهارات الجافة بقرب أفران الغاز أو المايكروويف أو أي مصدر للحرارة أو الرطوبة كأجهزة غسل الصحون وغلايات الماء.
وخليكِ دايما عارفة إن الأعشاب والبهارات دي لو خزنتيها بشكل صح فده ممكن يخليها تحتفظ بنكهتها لمدة عام او اتنين.
وبالنسية لحفظ البقوليات زي الفول والعدس، فياريت لو الجو حار إنك تحطيها في أكياس بلاستيك وتقفليها كويس ودخليها الثلاجة..
النصيحة التاسعة
لتطرية شرائح البوفتيك اللي إنتِ عايزة تشويها يبقى ياريت إنك تضيفي ملعقة كبيرة خل على تتبيلة اللحمة.
كمان ياريت تعملي أكتر من شق في أطراف قطعة اللحم أو الهامبورجر قبل ما تحمريها أو تشويها لأن ده بيمنع عملية تقوس قطعة اللحم أو الهامبورجر وبيخليها تستوي بسرعة.
النصيحة العاشرة
علشان تحافظي على الجبنة القريش في الثلاجة أكبر فترة ممكنة يبقى ياريت تحطيها في لبن بارد ومعاها قرن فلفل أخضر حامي.
او إنك تغلي كوباية ميّة وبعد كده تسيبيها لغاية ما تبرد وبعد كده تضيفي إليها شوية ملح وتحطي فيها الجبنة وقرن شطة أخضر حامي.
**************************
أكيد وإنتِ في بيت والدك قبل ما تتجوزي كنت بتقومي من النوم متأخرة أو ترجعي من الشغل تلاقي البيت خلاص اتوضب وكل حاجة تمام وأكيد برضه عمرك ما فكرتِ البيت ده اتوضب إزاي؟؟
لكن زي ما أنت عارفة إن الوضع دلوقت اتغير خلاص وبقيتِ أنت "ست البيت" زي ما بيقولوا وبقيتِ كمان مسئولة عن كل حاجة فيه وعن نظافته من الألف للياء...
وأكيد برضه نفسك إن جوزك وحماتك وكل أهلك اللي ييجوا لك البيت ييجوا ويلاقوا بيتك نظيف وريحته حلوة والكل يحلف بنظافة بيتك..
طبعا ممكن إنك تعتمدي على واحدة تيجي لك مرة في الأسبوع تنظف لك البيت مرة وخلاص بس افرضي إن الست دي ماجتش تنظف هتعملي إيه ؟؟
هتسيبي البيت يضرب يقلب كده لغاية ما الست تيجي.. ولاّ هتعملي إيه؟؟؟
أكيد لازم إنك تنظفيه بنفسك..
:
:
:
نصائح ما قبل التنظيف
شوفي يا ستي.. فيه شوية نصائح كده لازم أقول لك عليها في الأول علشان تاخدي بالك قبل ما تبدئي تنظفي.
والنصائح دي هي...
النصيحة الأولى
اختاري اليوم
خليكِ ذكية واختاري اليوم اللي هتنظفي فيه وده عن طريق إنك قبل ما تنظفي تشوفي نشرة الأخبار الجوية قبلها بيوم علشان تعرفي حالة الجو هتكون أخبارها إيه.. لو عرفتِ إن الجو بكرة فيه تراب أو ممطر يبقى بلاش تنظفي في اليوم ده علشان مجهودك هيضيع على الفاضي، وده لأنك أكيد هتحتاجي تفتحي الشبابيك، وبالتالي التراب هيدخل وكأنك ماعملتيش حاجة.. لكن لو عرفتِ إن الجو حلو يبقى اتوكلي على الله ونظفي براحتك.
النصيحة التانية
ابدئي بالصعب
ياريت تبدئي بالأوضة اللي هتحتاج منك وقت طويل في التنظيف وده علشان هتكوني لسه في البداية وعندك حماس كاف وهتروقيها كويس جدا..
وسيبي اللي مش محتاجة شغل كتير إلى النهاية علشان هتكوني تعبتِ وبالتالي الأوضة دي هتكون مش محتاجة منك مجهود كبير.
النصيحة الثالثة
خلي أدوات التنظيف جنبك
خدي كل أدواتك اللي هتحتاجيها في التنظيف معاكِ إلى الأوضة أو المكان اللي أنتِ هتنظفيه وده علشان تريحي نفسك من الخروج والدخول من أوضة إلى التانية.
وياريت إنك تخلي جنبك في الأوضة اللي أنت بتنظفيها سلة مهملات أو كيس أسود علشان ترمي فيه أي حاجة أنتِ مش عايزاها.
النصيحة الرابعة
شيلي أي أسلاك كهرباء
قبل ما تبدأي في الترويق ياريت إنك تشيلي أي أسلاك كهربائية من الكهرباء زي سلك التليفزيون أو التليفون أو الكمبيوتر أو أسلاك الأباجورة وغيرها من الأسلاك الموجودة في البيت.
كمان ياريت إنك تشيلي أي فازات أو أي حاجات تخافي عليها إنها تقع وأنت بتنظفي وتحطيها في مكان ثابت.
النصيحة الخامسة
اكنسي السجادة وشيليها
ياريت تكنسي السجادة الأول على الوش والظهر بالمكنسة وتشيليها وده علشان مفيش أي تراب ييجي عليها ويبهدلها لك زيادة.
النصيحة السادسة
روقي من أعلى إلى أسفل
ياريت وأنت بتروقي الغرفة تبدأي تنظفيها من أعلى إلى أسفل وده علشان التراب اللي في السقف ينزل إلى أسفل وبعد كده تبدأي إنك تكنسيه بالمكنسة.
بس يا ستي دي نصائح عامة علشان تبقي محددة أنتِ عايزة تعملي إيه بالضبط..
تعالي نشوف بقى خطوة خطوة هنروق إزاي.
.
.
.
.
بعد ما جهزتِ كل الحاجات بتاعتك وخلاص نويتِ إنك تنظفي تعالي نعرف واحدة واحدة إزاي إنك ممكن تنظفي كل حتة في البيت وخدي بالك إننا هنمشي بالترتيب
نشوف مع بعض..
أولا: بالنسبة للشبابيك والبلكونات
1- افتحي الشبابيك والبلكونات وهاتي فرشة وابدأي في تنظيف أي تراب موجود على الشباك..
2- بعد ما تشيلي التراب هاتي قطعة قماش قطنية مبللة بالمية وامسحي بيها الزجاج لو حسيتِ إن الزجاج مش بيلمع يبقى ضيفي إلى قطعة القماش دي ملعقة خل أو رشي الزجاج بملمع الزجاج.
3- خدي بالك من إنك تنظفي الزجاج الداخي بشكل رأسي والزجاج الخارجي بشكل أفقي وإنك في النهاية تستخدمي ورق الجرائد علشان تنشفي الزجاج من أي آثار للمية.
ثانيا: بالنسبة لتنظيف الأبواب والجدران والأرضيات
مفيش شك إن نظافة البيت بتبان من نظافة الأبواب الداخلية والجدران والأرضيات وإن لونهم يكون بيلمع ومفيش فيهم أي آثار للبقع علشان كده هنقول لك على طريقة بسيطة جدا هتساعدك إنك تنظفيهم..
1- بفرشة السقف ابدأي في إزالة أي آثار للتراب من على الجدران والأبواب.
2- وبعد كده اكنسي الأرض بالمكنسة.
3- بعد كده هاتي جردل وحطي فيه مية وملعقة كبيرة صابون وهاتي ليفة أطباق تكون جديدة وخليها لتنظيف الأبواب والجدران وابدئي في مسح الأبواب بيها وبعد كده هاتي قطعة قماش قطنية مبللة بالمية وامسحي الباب بيها وبعد كده امسحي الباب بقطعة قماش ناشفة وده علشان تتأكدي من إن الباب نشف كويس.
4- بالنسبة للجدران بلاش تمسحي الجدران كلها واكتفي فقط بإنك تمسحي الحتة اللي فيها بقع بنفس الطريقة اللي مسحتِ بيها الباب.
5- بعد ما تنتهي من تنظيف الأبواب والجدران ابدأي في مسح الأرضيات.
ثالثا: بالنسبة لتنظيف أثاث المنزل
هاتي قطعة قماش كبيرة وابدأي في إزالة أي تراب من على الأثاث ولمعي الأثاث بملمع الأثاث الموجود عندك..
وخدي بالك كويس وأنت بتنظفي إنك ما تجيبيش أي نقطة مية على الأثاث نهائي ولو فرض وإن فيه نقطة مية جت غصب عنك يبقى ياريت إنك تسيبيها لغاية ما تنشف وبلاش تمسحيها بفوطة علشان المية ما تنتشرش على نطاق أوسع.
رابعا: بالنسبة لتنظيف المطبخ
بعد ما خلصتِ الشقة خلاص ادخلي على المطبخ وابدأي في التفتيش في أدراج المطبخ والثلاجة وشوفي إيه اللي أنت محتاجة له وسيبيه واللي مش محتاجة له إرميه زي مثلا العلب الفاضية والخضراوات والفواكه اللي لونها اتغير وبقت غير صالحة للأكل..
بعد كده ابدأي في ترتيب الرفوف الموجودة في المطبخ بإنك تطلعي كل اللي فيها وتمسحيها وتمسحي الدواليب من الأعلى وتفرشي فيها ورق جرايد أو مفارش بلاستيك لو عندك.
بعد كده ابدأي في تنظيف البوتاجاز بإنك تجيبي قطعة قماش أو إسفنجة مبللة بالماء وأي مسحوق تنظيف أنت بتستخدميه وابدأي في مسح سطح وجوانب البوتاجاز وبعد كده هاتي قطعة تانية نظيفة وجافة تماما وامسحي بيها البوتاجاز بعد كده هاتي ورق فويل "ألومونيوم" وغطي بيه البوتاجاز ماعدا مكان عيون البوتاجاز وعلى فكرة الورق ده هيخلي لك البوتاجاز نظيف لأطول فترة ممكنة.
بعد ما خلصتِ البوتاجاز ابدأي في تنظيف ترابيزة المطبخ والثلاجة بنفس الطريقة اللي نظفتِ بيها البوتاجاز.
بالنسبة لتنظيف سيراميك المطبخ سواء الجدران أو الأرض فلها أكتر من طريقة إما إنك تجيبي جردل مية وتضيفي إليه نص كوب خل أبيض وعصير نص ليمونة وتجيبي فرشاة السيراميك وتبدأي في تنظيف السيراميك وبعد كده تغسلي السيراميك بالمية.
أو إنك تجيبي جردل مية وتضيفي إليه صابون سائل وتبدأي في مسح السيراميك باستخدام قطعة قماش خشنة أو فرشاة وبعد كده تغسلي السيراميك بالمية.
خامسا: بالنسبة لتنظيف الحمام
أكيد أكتر حاجة أنت بتكرهيها هي تنظيف الحمام بس لو سمعتِ النصائح اللي هنقولك عليها دلوقت مش هتلاقي أي مشكلة في نظافة حمامك..
شوفي ياقمر..
1- بالنسبة لتلميع الخلاطات الإستانلستيل ياريت إنك تجيبي ليفة خشنة أو قطعة قماش صوف وتحطيها في صابون أو أي ملمع للحمامات وتبدأي في دعك الخلاطات بيها وبعد كده تغسلي الخلاطات كويس بالمية.. لو الطريقة ماجابتش نتيجة ممكن إنك تمسحيها بقطعة قماش مغموسة في خل أو زيت طعام وبعد كده تغسليها بالمية.
2- بالنسبة لتنظيف البانيو والأحواض اللي عملتيه مع الخلاطات هتعمليه مع البانيو والأحواض وعلى فكرة الطريقة دي بتخليهم يلمعوا وبتنظفهم كويس جدا..
3- بالنسبة لتنظيف المرحاض يبقى ياريت إنك في بداية اليوم اللي هتنظفي فيه تحطي فيه ¼ كوب (كلوروكس)وسيبيه وبعد كده هاتي الفرشاة الخاصة بيه وادعكيه بيها كويس بعد كده اشطفيه كويس بالمية ده للجزء اللي جوه وبالنسبة للجزء الخارجي نظفيه بنفس الطريقة اللي نظفتِ بيها البانيو.
4- بعد كده ابدأي في مسح الجدران والأرضيات بنفس الطريقة اللي مسحتِ بيها الجدران والأرضية بتاعة المطبخ..
سادسا: افرشي الشقة
بعد كده افرشي الشقة زي ما كانت، ولمعي الزجاج والمرايات اللي عندك بملمع الزجاج واقفلي الشبابيك والبلكونات ورشي في الشقة معطر جو..
مستنية ردودكم
الأحد أغسطس 29, 2010 5:01 am