عايزه تخسى بابسط الطرق

تجربة على لسان بنوتة

الاول لازم تعرفوا ان اساس الرشاقة مش انك تمتنعى عن الاكل الدسم والزيت والزبدة لانك لو عملتى كدة هتلاقى جفاف فى بشرتك وشحوب وجفاف فى شعرك و دة كمان غلط عالكبد انا جربت زمان اكل من غير دهون وكانت النتيجة انى خسيت جدا فعلا لكن المساوئ اللى حصلتلى

1-وصلت لدرجة النحافة الشديدة

2-جفاف فى شعرى وبشرتى واسمرار

3-جالى الصفرا والتهاب فى الكبد واما رحت للدكتور قاللى لانك منعتى اى دهون تدخل جسمك ودة غلط

4- وشى خس جدا

يعنى بقيت زى بتوع الصومال بالظبط مع ان اصل بشرتى بيضا ومليانة

واهم مساؤى الطريقة دى هى انك مش بتعرفى تثبتى على اى وزن لانك لو منعتى الدهون هتفضلى تخسى تخسى لغاية ماتبقى عصاية وكمان انتى مش هتقدرى تعيشى عالنظام دة طول العمر ولو اكلتى اى حاجة فيها دهون هتتخنى اكتر من الاول لان الحرق بتاعك بيقل خالص فياريت محدش يستعمل الطريقة دى


الطريقة الصحيحة اللى انا عاوزة اقلهالكم وجربتها والحمد لله خسيت هى مش ريجيم هى نظام غذائى تقدرى تمشى عليه طول عمرك لانك بتاكلى فيه كل حاجة ومافيش اى حاجة ممنوعة بالعكس لازم التنوع

ودى الارشادات اللى هتتبعيها واللى انا جربتها وجابت معايا نتيجة حلوة اوى وعلفكرة انا خسيت من الطريقة دى بسرعة جدا لان ممكن يكون جسمى طبيعته كدة وفيه ناس تانية ممكن تخس ببطء بس اللى متاكدة منه انك هتخسى وبدون اى تعب

* الحاجة الاساسية فى النظام دة هو الماااااء اشربى مية على قد ماتقدرى بس اكتر كمية هتشربيها هى قبل الاكل الطريقة انك قبل ماتبدأى تاكلى الاكل اللى بيتخن يعنى اللى فيه دهون او زيوت هو انك هتشربى مية وتاكلى اى حاجة مابتتخنش زى فواكه او سلطة او خضرة اى كمية تحبيها وتشربى معاها مية مش هقولك كام كباية ولا تاكلى من الحاجات دى قد ايه كلى لغاية ماتحسى ان بطنك اتملت او قربت تتملى

اول ماتحسى ان بطنك اتملت ممكن تبداى تاكلى الاكل اللى بيتخن وممكن يكون فيه زيت او زبدة او سمنة حتى عادى لانك مش هتاكلى كتير منه ولازمتعرفى انك مش هتقدر تبعدى عن الاكل الدسم دة خصوصا لو انك فى مصر المهم انك تاكلى الاكل دة بحزر وتاكلى منه نونو نونو وياريت لو تاكليه بالشوكة والسكينة هتلاقى نفسك خلاص اصلا مش قادرة تكملى

مثال

احنا كنا عاملين بانيه ومكرونة النهاردة والاكل دة زى مانتوا عارفين دسم اوى وبصراحة انا بحبه اوى والصينية الحمد لله كانت مليانة بانيه ومكرونة انا بجيب شفشق مية وكوباية كبيرة اوى وشربت اول كوباية وبعدين كان عندنا بلح اكلت بلح بتاع خمس ست بلحات وبعدين شربت كوباية مية تانى وبعدين كان فيه سلطة رحت اكلت بتاع خمس ست سبع معالق سلطة وبعدين شربت كوبايتين مية حسيت انى بطنى هتتملى جبت طبق وشوكة وسكينة وجبت حتة بانيه وقعدت اكل منها واقطعها حتة حتة صغيرة واكلت معاها معلقتين مكرونة واول ما الحتة دى خلصت والله لقيت نفسى مش قدرة اكمل كانى اكلت حلة بانيه ومكرونة

مزايا النظام دة

1-اهم ميزة انك تقدرى تستمرى عليه طول الوقت ودة كمان لتثبيت الوزن

2-هتلاقى صحة ولمعان فى بشرتك وشعرك ووشك رد مع انك بتخسى لان المية بتغسل الجسم وبتنقى البشرة وبتحفز طبقات الكولاجين فى البشرة فبتخليه مايخسش ويرد

3-محدش من اهلك ولا اصحابك هيقلك يابنتى كلى متعمليش ريجيم ومحدش هيحس اصلا انك عاملة ريجيم ودة مهم لان فيه ناس بتيأس من الكلام دة

4-ممكن تحددى عاوزة تخسى قد ايه يعنى مثلا لو انتى تخينة اوى هتفضلى تشربى مية وتاكلى سلطة وفواكه كتير اوى لغاية ماتشبعى خالص وبعدين تاكلى حتة بانيه وحدة ومعلقة مكرونة لو انتى مش تخينة اوى هتقللى من الاكل اللى مابيتخنش يعنى تقللى كباية مية على كام معلقة سلطة وتاكلى حتتين بانيه واربع معالق مكرونة وهكذا

5- النظام دة هيرغمك انك تاكلى فواكه وخضراوات وتشربى مية والحاجات دى صحية جدا جدا وبتعالج امراض كتير

6 -مش هتتخنى تانى ابدا لان دة نظام طول العمر


محفزات النظام


يعنى الحاجات اللى بتخليكى تخسى بسرعة

1- اتحركى فيه قاعدة انا مجرباها انا بقول(لو عاوزة تثبتى على وزنك اتحركى قد الاكل اللى بتاكليه ولو عاوزة تخسى اتحركى اكتر من الاكل اللى اكلتيه وكل ماتعرقى كل ماتخسى ولو عاوزة تتخنى اتحركى برده بس اقل من الاكل اللى اكلتيه ) ممكن تعملى تمارين او ممكن ترقصى الرقص دة احسن حاجة لانه مش بس بيخسس لا كمان بينحت الجسم ويخلي ليكى وسط وشكله حلو


2- فيه اكلات بتساعد على الحرق هما بيقولوا حاجات كتير لكن انا اللى مجرباهم بصراحة


1- عين الجمل اكتر حاجة خسستنى كلى منه زى مانتى عاوزة لانه بيحرق جامد هتحسى اول ماتاكليه وتتحركى ان جسمك سخن وعرق اوى

2-المية باللمون

3-القرفة بالزنجبيل

ملحوظة

حاولى فى النظام دة او اى نظام غذائى تاخدى فيتامين انا باخد فيتوبلاس (فيتامين ب وجينسنج) بينشط اوى وكمان بيساعد عالتركيز وبيبيض ومفيد للبشرة