انت زى كل بنت
كنت بتعانى من شعرك اشد المعاناه وكنت مستغربة ان شعرك مبقاش ناعم وعلى طول هايش وبتلاقى صعوبة فى تسريحه
يبقى اكيد لازم تاخدى موقف
وبالفعل
اعتنى بيه!!
ماتستغربيش ..لان السبب الرئيسى فى تلف الشعر هو عدم الاعتناء به!
ودى حقيقة كلنا مش هننكرها وطبعا من كثرة مشاغلنا وضيق الوقت مش عندنا وقت فاضى نعتنى بنفسنا!
النهاردة بقى انا مش هقولكم على وصفة ولا على اى اختراع ولا اى حاجة تاخد منك وقت..
باختصار ..كلامى النهاردة للمرأة العملية
وكل الموضوع انها هتغير من النظام التقليدى وهتضيف حجات وهتستغنى عن حجات
اولا: اللى هنستغنى عنه هو الشامبو او على الاقل نقلل من استخدامه فعلا لانه مضر كمان اغلب دكاترة الجلدية بينصحوا دايما بالابتعاد عنه لانه بيزيل اغلب الزيوت الطبيعية اللى بتعمل تلين للشعر وعشان كده بتظهر مشاكل التلف والجفاف
ثانيا : عمل حمام كريم وافضل نوع جربته فعلاااااااا من بين عشرات الانواع واللى خلانى اكتب الموضوع ده
هو
بوناويل ..
رخيص ومتوفر فى الصيدليات
وعملى جدا واهم حاجة نتيجة رااااااائعة ومن اول مرة والله
بجد انا بقالى شهر ونص بستخدمه وبجد نتيجة لا توصف وهتحسى بالفرق
اعتقد ان مفيش اسرع من كده انتى اما تاخدى شاور هتغسلى شعرك وحتى لو استخدمتى شامبو واستخدمتى بعده بوناويل هتلاقى برضه نتيجة هايلة جدا وتسيبه على شعرك من 3 الى 5 دقائق على ماتعملى جسمك وبعدين اشطفى شعرك وشوفى النتيجة
بوناويل مشهور وكتير يعرفه
يوجد فى الصيدليه منه اكياس ب2 ج الكيس يكفى لحوالى5 مرات
او فى على هيئة انبوبة ب8 ج
او العلبة اللى فى الصورة ب14 ج وفى علبه زيها بس اكبر بس اغلى شوية
*******
اسفة على التطويل ولكن احب اقول شوية معلومات بسيطة :
-اذا كان شعرك تقيل جدا وملبد وكمان هايش زى حالاتى كده افضل حل فعلا وعن تجربه انك ممكن تقصى الشعر اللى فى اسفل الراس وتسيبى الاجزاء اللى فى الاعلى زى ماهى والطريقة دى هتبين ان شعرك طويل زى ماهو وكمان هيكون خفيف لانك خففتيه بتقصير الاجزاء الداخليه اللى مش باينه اساسا (حد فاهم حاجة؟؟)عمتا لو كان شعرك تقيل وكتير والدنيا حر وعايزة تخففيه مع الاحتفاظ بطوله ممكن تقصى فقط الاجزاء الداخليه(الى فى اسفل الراس) وتسيبى الاجزاء اللى فوق زى ماهى وهيبان ان شعرك طويل وزى ماهو.
- اذا كان شعرك خفيف جدا وعامل زى ديل المعزة هههههه(اسفة جدا) بس افضل حل انك كل شهر تقصى اطرافه يعنى حوالى 2 سم
-احذرى من تمشيط الشعر وهو مبلل لان الشعر بيكون ضعيف مما يؤدى الى تقصفه وتلفه
- احذرى من استخدام السيشوار بعد الاستحمام مباشرة لانه مضر وكما قرات والله اعلم انه يسبب سرطان لقدر الله
- حاولى تسيبى شعرك فى المنزل او تتخلصى من لفة الكحكة لان ربط الشعر بطريقة واحدة بيعمل تموجات فيه يصعب التخلص منها على المدى البعيد
-ابتعدي عن صبغات الشعر الكيميائية، واستبدليها بالحناء بمختلف ألوانها ودرجاتها
-تأكدي من زوال بقايا الشامبو والبلسم من الشعر عند غسله
-احذري وضع البلسم على منابت الشعر، وضعيه فقط على الأطراف.
-استخدمي الماء الفاتر مع بداية غسيل الشعر، وتجنبي غسيل الشعر بماء بارد دائما.
-لا تغسلي شعرك بالشامبو العادي أكثر من مرة واحدة أسبوعيا؛ فتكرار الغسيل بالشامبو يؤدي إلى ضعفه وفقدان نضارته
-عليك الانحناء إلى الأمام عند غسل شعرك؛ لأن هذا الوضع يساعد فروة الرأس على تجديد دورتها الدموية.
-استخدام مشط خشبى ذو اسنان واسعة او فرشاة (بس يكون نوعها نضيف لان النوع الرخيص فعلا بيبوظ الشعر)وتكون برضه اسنانها واسعة
فى النهاية...اتمنى اكون وفقت فى المعلومات البسيطة دى واكون افادتكم واللى عندها اى اضافة ياريت تقولهلنا ومستنية ردكم وجزاكم الله خيرا
الأحد أغسطس 29, 2010 1:24 am